जेन जी आन्दोलनको क्रममा भदौ २४ गते भएको विध्वंससम्बन्धी विभिन्न कसुरहरूमा काठमाण्डू उपत्यकामा ३७९ मुद्दा सहित देशभरि कुल ९३३ वटा मुद्दा दर्ता गरिएको सुरक्षा अधिकारीहरूले जानकारी दिएका छन्। विभिन्न आपराधिक घटनासँग संलग्न ९६३ जना अभियुक्तहरू चैत १५ गतेसम्म पक्राउ भएका छन् भने तीमध्ये १९१ जना अझै पुर्पक्षका लागि थुनामा छन्। बाँकी ४७४ जनालाई धरौटीमा रिहा गरिएको छ। पक्राउ परेका मध्ये करिब ७०० जनाविरुद्ध आपराधिक उपद्रवको आरोप लगाइएको छ भने २० जना विरुद्ध कर्तव्य ज्यान मुद्दा दर्ता गरिएको नेपाल प्रहरीका प्रवक्ताले बताए।
पूर्वन्यायाधीश गौरीबहादुर कार्की नेतृत्वको छानबिन आयोगले भदौ २३ गतेको घटनामा कारबाहीको सिफारिस गरेसँगै, वालेन्द्र शाह नेतृत्वको सरकार गठन भएको केहि समयपछि शनिबार बिहान पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउ परेका थिए। उक्त छानबिन आयोगले भदौ २४ गतेको विध्वंस, आगजनी र तोडफोडको विषयमा अलग्गै छानबिन गर्न सुझाव दिएको थियो, तर यस विषयमा कस्तो संयन्त्र बनाउने भन्नेबारे सरकारले अझै टुङ्गो लगाउन सकेको छैन।
प्रहरीका अनुसार भदौ २४ गतेको घटनासँग सम्बन्धित विभिन्न १३ प्रकारका कसुरमा ९६३ जनामाथि मुद्दा चलाइएको छ। आपराधिक उपद्रव शीर्षकमा ८०२ वटा मुद्दा दर्ता भएका छन्। कर्तव्य ज्यान शीर्षकमा चार वटा मुद्दा दर्ता भएको उल्लेख गर्दै २० जना अभियुक्त पक्राउ परेका छन्। काठमाण्डू उपत्यकामा मात्र ३७९ मुद्दा दर्ता भएका छन्। काठमाण्डू, ललितपुर र भक्तपुरमा ४२० जनालाई पक्राउ गरिएको प्रहरी दर्ताहरूले देखाएको छ।
नेपाल प्रहरीका प्रवक्ता अबिनारायण काफ्ले भन्छन्, “जाँचबुझ आयोगहरूबाट प्रतिवेदन आएपछि कर्तव्य ज्यानको मामलामा कुनै पनि बेला मुद्दा चलाउन सकिन्छ। आगजनी र तोडफोड जस्ता फौजदारी ऐनअन्तर्गत आउने विषयमा आएका सबै जाहेरीहरूका आधारमा ९३३ वटा मुद्दा दर्ता भएका छन्।” सरकारले भदौ २४ गतेको घटनाको छानबिनका लागि एक हप्ताभित्र उच्चस्तरीय समिति गठन गर्ने निर्णय गरेको छ।
