दिउँसो मादक पदार्थ सेवन गरेर सवारी चलाउने चालकहरूलाई ट्राफिक प्रहरीले कडा कारबाही, १६ जना सजाय पाएका

१८ चैत, काठमाडौं । मध्याह्न समयमा मादक पदार्थ सेवन (मापसे) गरेर सवारी चलाउने प्रवृत्तिलाई नियन्त्रण गर्न ट्राफिक प्रहरीले चेकिङ कडा बनाएको छ। यसअघि केवल राति करिब ८ बजेपछि मात्र मापसे परीक्षण गरिन्थ्यो, अब दिउँसो पनि नियमित रूपमा मापसे परीक्षण गर्ने काम थालिएको छ। काठमाडौं उपत्यका ट्राफिक प्रहरी कार्यालय रामशाहपथका एसएसपी नवराज अधिकारीले गुनासो बढेकाले दिउँसो मापसे चेकिङमा विशेष जोड दिइएको जानकारी दिए।

बुधबार गरिएको पछिल्लो चेकिङमा मात्रै १६ जना चालक पक्राउ परेका छन्। मापसे गरेर सवारी चलाउनेहरूलाई ट्राफिक प्रहरीले गाडी सहित रामशाहपथमा ल्याएर सम्बन्धित प्रहरी इकाइमा कारबाहीका लागि बुझाएको एसएसपी अधिकारीले बताएका छन्। पहिले ट्राफिकले केवल जरिवाना लगाउने गरे पनि अहिले नियन्त्रणमा लिएर प्रहरी समक्ष बुझाउने व्यवस्था गरिएको छ। समातिएका चालकहरूमा स्कूल बसका चालकहरू पनि रहेका छन्। यस कारबाहीमा स्कूल बस चालक, सार्वजनिक बस चालक र माइक्रोबसका चालकहरू समेत समावेश छन्।