१९ चैत, काठमाडौँ। नेकपा एमालेका उपाध्यक्ष विष्णु पौडेलले पार्टी संसदीय दलका नेता रामबहादुर थापा ‘बादल’का अभिव्यक्तिप्रति आपत्ति व्यक्त गरेका छन्। थापाले बिहीबार प्रतिनिधि सभाको बैठकमा सम्बोधन गर्दै जेनजी आन्दोलन र रास्वपासम्बन्धी कटाक्ष गरेका थिए। पौडेलले उक्त अभिव्यक्तिप्रति असहमति व्यक्त गर्दै भने, ‘प्रतिनिधि सभाको आजको बैठकमा नेकपा (एमाले) को दल नेताका रूपमा माननीय रामबहादुर थापाले व्यक्त गर्नुभएको विचार पार्टीका स्थापित नीति र मान्यतासँग विपरीत छ।’
पौडेलले थापाका अभिव्यक्तिबारे भोलि हुने केन्द्रीय समितिको बैठकमा चर्चा र निर्णय हुने अपेक्षा व्यक्त गरेका छन्। उनले थप भने, ‘यस विषयमा भोलि आयोजना गरिएको नेकपा (एमाले) को केन्द्रीय सचिवालय बैठकमा गम्भीरतापूर्वक छलफल हुनेछ र उपयुक्त निर्णय हुनेछ भन्ने आशा राख्छु।’ थापाले जेनजी आन्दोलन, नेपाली सेना र सुशीला कार्की नेतृत्वको सरकारलाई प्रश्न गरेका थिए। उनले भनेका थिए, ‘यो अवस्था ल्याउनमा प्रमुख भूमिका खेलेको र संविधान निर्माणमा सहकार्य गरेको दल नेकपा एमाले अहिले सरकारको विपक्षी दल नभएर राज्यपक्षीय दल हो।’
