२१ चैत, काठमाडौं। नेपाली कांग्रेसका नेता डा. शेखर कोइरालाले प्रतिनिधि सभा निर्वाचनमा आफ्नो पार्टीको पराजयको प्रमुख कारण ‘स्विङ भोट’ भएको बताएका छन्। शनिबार काठमाडौंस्थित वीपी स्मृति सामुदायिक सहकारी अस्पतालको १८ औं वार्षिक साधारण सभामा उनले यसबारेमा आफ्नो धारणा व्यक्त गरेका हुन्। हालै सम्पन्न निर्वाचनमा मतदाताले पार्टीलाई स्थायी रूपमा छोडेर होइन, केवल मत ‘स्विङ’ गरेको दाबी गर्दै कोइरालाले अब मत ‘सिफ्ट’ हुने जोखिमलाई रोक्नुपर्नेमा जोड दिए।
संसदमा कांग्रेसको उपस्थिति कमजोर हुनुमा जनताको इच्छा र नयाँ राजनीतिक ‘हावाहुरी’लाई बूझ्न नसक्नु मुख्य कारण भएको उनी बताउँछन्। ‘धेरैले सोच्छन्, कसरी हार्यो, के गरियो, के भयो,’ नेता कोइरालाले भने, ‘तर त्यस्ता हावाहुरी र हुंडरीहरू आएका हुन्, जसलाई हामीले सही तरिकाले बुझ्न नसक्यौं।’ उनले आगामी लडाइँ वामपन्थीसँग भन्दा ‘लिबरल डेमोक्रेट्स’सँग हुने भएकाले पार्टीको संगठनलाई सशक्त बनाउनुपर्नेमा विशेष जोड दिए।
‘पहिले हाम्रो संघर्ष वामपन्थीसँग हुन्थ्यो, त्यो सजिलो थियो। अबको लडाइँ लिबरल डेमोक्रेट्ससँग हुनेछ,’ उनले भने, ‘त्यसमाथि हामी पछि पर्नुहुँदैन भन्ने मेरो दृढ विश्वास छ। हाम्रो संगठन छ र हामी यो सामना गर्न सक्षम छौं।’ सुरु देखि नै केन्द्रीय कार्यसमितिले विशेष अधिवेशनमा जानुपर्ने निर्णय गरेको कुरा उनले स्मरण गराए। विशेष अधिवेशनबाट गगन थापालाई सभापति चयन गरिएको विषयमा शेरबहादुर देउवा र पूर्णबहादुर खड्काले सर्वोच्च अदालतमा मुद्दा दायर गरेको र हालैसम्म त्यो मुद्दाको अन्तिम फैसला हुन बाँकी रहेको उनले बताए।
अदालतको प्रक्रिया जस्तो भएपनि पार्टीलाई एकताबद्ध बनाउन आफू लगातार प्रतिबद्ध रहेको नेता कोइरालाले व्यक्त गरे। ‘मुद्दाको सुनुवाइ भोलिदेखि सुरु हुनेछ। अब कति समय लाग्छ भन्ने भन्न सकिँदैन,’ उनले भने, ‘तर नेपाली कांग्रेसलाई एकताबद्ध र एक ठाउँमा ल्याउने मेरो अन्तिम प्रयास हुनेछ।’
