अमेजनले सन् २०१२ र त्यसअघि सार्वजनिक गरिएका पुराना किन्डल ई-रिडरहरू र किन्डल फायर उपकरणहरूमा मे २०, २०२६ देखि किन्डल स्टोरको पहुँच स्थायी रूपमा बन्द गर्ने निर्णय गरेको छ। यस निर्णय अनुसार, मे २० पछि ती उपकरणहरूबाट नयाँ किताबहरू खरीद, सापटी वा डाउनलोड गर्न असम्भव हुनेछ, तर पहिले डाउनलोड गरिएका किताबहरू पढ्न भने मिल्नेछ। अमेजनका प्रवक्ता ज्याकी बुर्कले बताएका छन् कि यदि ती उपकरणहरूलाई ‘फ्याक्ट्री रिसेट’ वा ‘डिरिजिस्टर’ गरियो भने, तिनीहरूलाई पुनः दर्ता गर्न सम्भव छैन।
यो निर्णयले सन् २००७ मा सार्वजनिक पहिलो पुस्ताको किन्डलदेखि सन् २०१२ सम्मका ११ विभिन्न मोडेलहरूलाई प्रभाव पार्नेछ। मुख्य रूपमा प्रभावित मोडेलहरूमा २००७ को पहिलो जेनेरेसनको किन्डल, २००९ र २०१० का किन्डल डीएक्स, र २०१० को किन्डल किबोर्ड समावेश छन्। अमेजनले प्रभावित प्रयोगकर्ताहरूलाई इमेलमार्फत यसबारे जानकारी पठाउन सुरु गरिसकेको छ।
पुराना उपकरण छोडेर नयाँ किन्डल खरिद गर्न चाहने प्रयोगकर्ताहरूका लागि अमेजनले विशेष सुविधा पनि उपलब्ध गराएको छ। प्रभावित ग्राहकहरूले नयाँ किन्डल खरिद गर्दा २० प्रतिशत छुट र २० डलर बराबरको इबुक क्रेडिट पाउनेछन्। यो प्रस्ताव जुन २०२६ को २० तारिखसम्म मान्य रहनेछ।
