नेकपाले निष्कर्ष गर्यो– विद्यार्थी संगठनहरूलाई विद्यालय वा कलेजमा प्रतिबन्ध लगाउन नपाइने
नेकपाले विद्यार्थी संगठनहरूलाई विद्यालय वा कलेजमा प्रतिबन्ध लगाउन नपाइने निष्कर्ष निकालेको छ। पार्टीको केन्द्रीय कार्यसंयोजन बैठकले यस्तो निर्णय गरेको पार्टी नेता जगन्नाथ खतिवडाले जानकारी दिएका छन्। सरकारले १ सय बुँदे कार्यसूचीमा विद्यार्थी संगठन खारेज गर्ने प्रस्ताव राखेको थियो, जसको विरोध विभिन्न राजनीतिक दलका संगठनहरूले गरेका छन्। २८ चैत, काठमाडौं। नेपाली कम्युनिस्ट पार्टी (नेकपा) ले विद्यार्थी संगठनहरूलाई विद्यालय वा कलेजमा प्रतिबन्ध लगाउन नपाइने निष्कर्ष निकालेको छ। शनिबार केन्द्रीय कार्यालय पेरिसडाँडामा बसेको पार्टीको केन्द्रीय कार्यसंयोजन बैठकले यस्तो निर्णय गरेको पार्टीका नेता जगन्नाथ खतिवडाले जानकारी गराए। यसैक्रममा, नेकपाले यस विषयलाई अनुचित ठहर गर्दै जनता र ट्रेड युनियनको अधिकारलाई यसले कुण्ठित पार्ने निष्कर्ष निकालेको छ। ‘जनसंगठनहरू, विशेष गरी युवा विद्यार्थी लगायतका विद्यार्थी संगठनहरूलाई कलेजमा प्रतिबन्ध लगाउनु र ट्रेड युनियनहरूलाई प्रतिबन्ध लगाउनु गलत हो,’ बैठकको निष्कर्षबारे जानकारी दिँदै नेता खतिवडाले भने, ‘यसले जनता र ट्रेड युनियनको अधिकारलाई कुण्ठित बनाउँछ। यस्तो गर्न पाउन हुँदैन। यसको विरोधमा हामी उभिन्छौं भन्ने पार्टीले निष्कर्ष निकालेको छ।’ उनका अनुसार, केन्द्रीय कार्यसंयोजन समितिको अर्को बैठक ३ वैशाखमा बस्नेछ, जहाँ बाँकी निष्कर्ष र निर्णयहरू पनि सार्वजनिक गरिनेछन्।
