३० चैत, काठमाडौं । राष्ट्रिय प्रजातन्त्र पार्टी (राप्रपा) की सांसद खुस्बु ओलीले आफूविरुद्ध सामाजिक सञ्जालमा दुष्प्रचार भएको भन्दै नेपाल प्रहरीले साइबर ब्युरोमा उजुरी दायर गरेकी छन्। उनले सोमबार सामाजिक सञ्जाल एक्समार्फत उजुरी दर्ता गरिएको जानकारी दिइन्। सांसद ओलीले लेखिन्, ‘म विरुद्ध सामाजिक सञ्जालमार्फत सुनियोजित रूपमा फैलाइएको दुष्प्रचार, भ्रामक सूचना तथा मेरो चरित्रहत्या गर्ने उद्देश्यले गरिएको गतिविधिविरुद्ध आज मैले नेपाल प्रहरीको केन्द्रीय साइबर ब्यूरो, भोटाहिटीमा उजुरी दर्ता गराएको छु।’
‘उक्त उजुरीमा केही व्यक्तिका फेसबुक पेज, टिकटक पेज तथा युट्युब च्यानलहरूले योजनाबद्ध रूपमा आधारहीन, भ्रामक तथा मेरो व्यक्तिगत तथा सार्वजनिक जीवनमा क्षति पुर्याउने उद्देश्यले सामग्री प्रसारण गरेको तथ्य समावेश गरिएको छ,’ उनले थपिन्। यस विषयमा आफूले प्रारम्भिक चरणमै केही सम्बन्धित व्यक्तिहरूलाई सचेत गराउन प्रयास गरेको र यस्तो गतिविधि रोक्न स्पष्ट चेतावनी दिएको दाबी उनले गरेकी छन्। ‘तर, उक्त चेतावनीलाई गम्भीरतापूर्वक नलिई निरन्तर रूपमा दुष्प्रचार जारी रहँदा बाध्य भएर आज साइबर ब्यूरोमा कानुनी प्रक्रिया अघि बढाएको हुँ,’ उनले भनिन्।
यस प्रकारका गतिविधिहरू सामान्य आलोचना वा अभिव्यक्ति स्वतन्त्रताको दायरामा नपर्ने उनको दाबी छ। उनले अगाडि लेखिन्, ‘बरु योजनाबद्ध रूपमा गलत सूचना फैलाउने तथा मेरो व्यक्तिगत र सार्वजनिक छवि धूमिल पार्ने उद्देश्यले गरिएको संगठित प्रयास भएको मेरो ठहर छ।’ साइबर दुरुपयोग र दुष्प्रचारविरुद्ध कानुनी प्रक्रियाअनुसार आवश्यक सबै कदम निरन्तर रूपमा अघि बढाउने प्रतिवद्धता उनले व्यक्त गरिन्। ‘अहिलेको समयमा घृणा नै नयाँ मुद्राजस्तो बनाइएको छ, जसले जतिन्जेल घृणा बेच्न सक्छ, त्यसले त्यति नै फाइदा उठाइरहेको छ,’ उनले भनिन्।
‘तर याद राख्नुहोस्, कसैको जीवनमा क्षति पुग्ने गरी घृणा फैलाएर त्यसबाट लाभ उठाउने प्रवृत्ति न केवल अनैतिक, तर अत्यन्तै पतित र अस्वीकार्य सोचको परिचायक हो,’ उनले भनिन्। यस्तो मानसिकता समाजकै लागि खतरा भएको उल्लेख गर्दै उनले यसलाई कुनै पनि हालतमा सामान्यीकरण गर्न नमिल्ने स्पष्ट पारिन्।
