काठमाडौं महानगरपालिकाले असन क्षेत्रमा प्रत्येक शनिबार सामाजिक, सांस्कृतिक र परम्परागत व्यापार प्रवर्द्धनका लागि विशेष कार्यक्रम सञ्चालन गरिरहेको छ। कमलाछी चोकदेखि असनसम्मको बाटो पूर्ण रूपमा सवारीसाधनको आवागमनबाट निषेध गरिएको छ। यस पहलले असनको मौलिकता संरक्षण गर्दै परम्परागत जीवनशैली, जात्रा, पर्व, संस्कार र पुर्ख्यौली ज्ञान निरन्तरता दिनुपर्ने लक्ष्य राखेको छ।
५ वैशाख, काठमाडौं। काठमाडौंको ऐतिहासिक असन क्षेत्रमा शनिबारदेखि सामाजिक, सांस्कृतिक र परम्परागत व्यापार प्रवर्द्धन कार्यक्रम शुरु गरिएको छ। असन क्षेत्रको सांस्कृतिक पहिचान र मौलिकतालाई जोगाउन काठमाडौं महानगरपालिकाले आजदेखि प्रत्येक शनिबार “जीवन्त र समृद्ध असन” कार्यक्रम संचालन गरेको छ। यस कार्यक्रमको मुख्य उद्देश्य काठमाडौंको सांस्कृतिक विरासत, परम्परागत जीवनशैली, जात्रा, पर्व, संस्कार, संस्कृतिको पुस्तान्तरणका साथै पुर्खाको ज्ञान र सीपलाई निरन्तरता प्रदान गर्नु हो।
कमलाछी चोक, भोटाहिटी चोक र महाबौद्धबाट असनसम्मको क्षेत्रमा सामाजिक, सांस्कृतिक तथा परम्परागत व्यापार प्रवर्द्धन कार्यक्रम सञ्चालन भएपछि सो क्षेत्रका प्रत्येक शनिबार सवारीसाधनको पूर्ण प्रवेश निषेध गरिएको छ। कार्यक्रममा लागू अवधिमा जमलतर्फ जाने सवारीसाधनको लागि कमलाछी सिंहढोकाबाट असनतर्फ सवारी प्रवेश पूर्णरूपमा रोक्ने व्यवस्था रहेको छ।
असन क्षेत्रमा भएको मौलिक सांस्कृतिक कार्यक्रमहरू र सामाजिक क्रियाकलापहरूको व्यवस्थापनको जिम्मेवारी महानगर प्रहरी बललाई प्रदान गरिएको छ। यस कार्यक्रममार्फत सांस्कृतिक पहिचान र परम्परागत जीवनशैली, जात्रा, पर्व तथा संस्कारहरूको पुस्तान्तरणलाई निरन्तरता दिन अपेक्षा गरिएको छ।
