राष्ट्रियसभा अध्यक्ष नारायणप्रसाद दाहाल र अष्ट्रेलियाका सभामुख मिल्टन डिकबीच शिष्टाचार भेंटवार्ता

६ वैशाख, काठमाडौं। राष्ट्रियसभा अध्यक्ष नारायणप्रसाद दाहाल र अष्ट्रेलियाको प्रतिनिधि सभा सभामुख मिल्टन डिकबीच शिष्टाचार भेंटवार्ता सम्पन्न भएको छ। यो भेंटवार्ता टर्कीको इस्तानबुलमा भइरहेको अन्तर व्यवस्थापिका संघको १५२औं महासभामा सहभागी हुन पुगेका दुवै नेताबीच भएको हो। भेंटमा, अध्यक्ष दाहालको सचिवालयका अनुसार, नेपाल र अष्ट्रेलियाबीचको द्विपक्षीय सम्बन्ध, आपसी हित र संसदीय सहकार्यका विषयमा विस्तृत छलफल गरिएको थियो।

अष्ट्रेलियाले नेपालका विकास र समृद्धिका लागि निरन्तर सहयोग गर्दै आएको उल्लेख गर्दै अध्यक्ष दाहालले आगामी दिनहरूमा थप सहयोग र सहकार्यको अपेक्षा व्यक्त गरे। यस क्रममा, अष्ट्रेलियाका सभामुख मिल्टनले अष्ट्रेलिया र नेपालको सम्बन्ध लामो समयदेखि अत्यन्तै सौहार्दपूर्ण रहेको र संसदीय सहकार्यले दुई देशबीचको सम्बन्धलाई अझ प्रगाढ र मजबूत बनाउने विश्वास व्यक्त गरे। उक्त भेंटमा नेपाली संसदीय प्रतिनिधिमण्डलबाट राष्ट्रियसभाका सदस्यहरू कृष्णबहादुर रोकाया, डा. अञ्जान शाक्य र राष्ट्रियसभा सचिव तुलबहादुर कँडेल समेत सहभागी थिए।