मण्डला थिएटर १८-३५ वर्षका युवाहरूका लागि निःशुल्क थिएटर निर्माण प्रक्रिया कार्यशाला आयोजन गर्ने

मण्डला थिएटरले १८ देखि ३५ वर्षसम्मका १५ युवा रंगकर्मीहरूका लागि निःशुल्क थिएटर प्रोडक्सन प्रक्रिया कार्यशाला सञ्चालन गर्न तयारी गरेको छ। नेपालको रंगमञ्च प्रवर्द्धनमा सक्रिय यो थिएटरले बुधबार सूचना जारी गर्दै इच्छुक युवाहरूबाट आवेदन माग गरेको छ। कार्यशाला विशेष गरी १८ देखि ३५ वर्ष उमेर समूहका १५ जना युवा रंगकर्मीहरूमाथि केन्द्रित छ। सहभागी हुन चाहनेले कम्तीमा दुईवटा नाटकमा काम गरेको अनुभव अनिवार्य हुनेछ।

छ हप्तासम्म चल्ने यस कार्यशालामा सहभागीहरूले अनुभवी नाट्यकर्मीहरूको प्रत्यक्ष मार्गदर्शनमा नाटक निर्माणको सम्पूर्ण प्रक्रिया सिक्ने अवसर प्राप्त हुनेछन्। अभिनय, निर्देशन, सेट तथा कस्ट्युम डिजाइन, प्रकाश, ध्वनि/संगीत, प्रचार-प्रसार र दस्तावेजीकरण जस्ता पक्षहरूमा विशेष कौशल विकास गरिने मण्डला थिएटरले जानकारी दिएको छ। कार्यशालाको प्रारम्भिक तीन हप्तामा आधारभूत तालिम र प्रारम्भिक निर्माण प्रक्रियामा जोड दिइनेछ।

यस कार्यशालाको प्रमुख उपलब्धिको रूपमा युवाका मुद्दामा आधारित एक नाटक तयार गरिनेछ, जुन मण्डला थिएटरको ‘स्मल हल’ मा नियमित रूपमा मञ्चन गरिने योजना रहेको छ। सहभागीहरूलाई निःशुल्क तालिम, खाजा, प्रमाणपत्र र पेशागत रंगमञ्चमा काम गरेको अनुभव प्रदान गरिनेछ। टिकट बिक्रीबाट प्राप्त आम्दानीको व्यवस्थापन पारदर्शी हुनेछ। प्रारम्भिक आम्दानीबाट हल भाडा र निर्माण खर्च कटौतीपछि बाँकी नाफा ६० प्रतिशत मण्डला थिएटर र ४० प्रतिशत सहभागी कलाकार तथा प्रोडक्सन टिमलाई वितरण गरिनेछ।

यो परियोजना आगामी जेठ १ गतेदेखि असार ५ गतेसम्म आइतबारदेखि शुक्रबारसम्म दिउँसो १२ बजे देखि ५ बजेसम्म सञ्चालन हुनेछ। इच्छुक रंगकर्मीहरूले २०८३ वैशाख २२ गतेभित्र आवेदन दाखिला गरिसक्नुपर्नेछ। प्राप्त आवेदनमध्ये संक्षिप्त सूचीमा परेका उम्मेदवारहरूलाई मात्र दोस्रो चरणको छनोट प्रक्रियाका लागि सम्पर्क गरिनेछ।