११ वैशाख, काठमाडौँ । जहाँ जति टाढा हुन्छौं, देशप्रतिको प्रेम त्यति नै गहिरो हुन्छ भन्ने भनाई लामो समय अष्ट्रेलियामा बसोबास गरेका खेम शर्माको जीवनसँग पूरै मेल खान्छ। विदेशी भूमिमा रहे पनि उनी स्वदेशको स्वरूप परिवर्तन गर्ने कार्यमा विशेषतः केन्द्रित छन्। केही वर्षदेखि नेपाली भूमिमा फर्केर उनले आफूलाई आफ्नो जन्मभूमिले तानेको महसुस गरे र नयाँ केहि गर्ने उद्देश्यले देशको भविष्य बदल्ने लक्ष्य लिए।
सरसफाइलाई सामान्य कुरा मान्नेहरूले यो अनुशासनका आधारभूत मापदण्ड मध्ये एकजस्तो बुझ्न सक्छन्, तर खेम शर्माका लागि सरसफाइ कुनै व्यक्तिगत विषय मात्र होइन, राष्ट्रको समृद्धिको पहिलो गम्भीर सीप हो। उनले अष्ट्रेलियामा र पछिल्लो वर्षहरूमा नेपालमा सरसफाइ अभियान सञ्चालन गरेर नेपाली समाजलाई सिक्न बाध्य बनाएको बताएका छन्। करिब दशक पहिले त्रिभुवन अन्तर्राष्ट्रिय विमानस्थल सफा गरेर सरसफाइको उच्च मानक स्थापना गरिसकेका थिए।
देशको समृद्धिका लागि प्रत्येक नागरिकको जागरूकता आवश्यक रहेको भन्दै शर्माले यस पटक पुस्तक मार्फत देशप्रति आफ्नो योगदान समर्पित गरेका छन्। २४ फरक शीर्षकका पुस्तकहरू डिजिटल रूपमा प्रकाशन गरेर उनले विश्व कीर्तिमान कायम गरेका छन्। राष्ट्रियसभा अध्यक्ष नारायणप्रसाद दाहालले प्रमाणपत्र प्रदान गरेका थिए।
‘रक्षा’, ‘गृह’, ‘परराष्ट्र’, ‘अर्थ’, ‘भूमि व्यवस्था’, ‘सहकारी तथा गरिबी निवारण’, ‘खानेपानी, सरसफाइ तथा फोहर व्यवस्थापन’, ‘कृषि तथा पशुपन्छी विकास’, ‘श्रम तथा रोजगार’, ‘यातायात तथा नागरिक उड्डयन’, ‘शिक्षा’, ‘विज्ञान तथा प्रविधि’, ‘संस्कृति तथा पर्यटन’, ‘सञ्चार तथा सूचना प्रविधि’, ‘स्वास्थ्य तथा जनसंख्या’, ‘सामाजिक विकास’, ‘संघीय मामिला तथा सामान्य प्रशासन’, ‘युवा तथा खेलकुद’, ‘सहरी विकास’, ‘वन तथा वातावरण’, ‘कानुन, न्याय तथा संसदीय मामिला’, ‘ऊर्जा, जलस्रोत तथा सिंचाइ’, ‘उद्योग, वाणिज्य तथा आपूर्ति, भौतिक पूर्वाधार’, र ‘संघीय मामिला तथा सामान्य प्रशासन’ जस्ता बिभिन्न विषयवस्तुका यी पुस्तकहरू डिजिटल रूपमा सार्वजनीक गरिएका छन्।
शर्माका यी डिजिटल पुस्तकहरूले विश्व कीर्तिमान कायम गर्न सफल भएका छन्। पुस्तक लेखनको अनुभव साझा गर्दै उनले अनिद्राका अनेक रातहरू बिताएको बताए। राष्ट्रनिर्माणका लागि ठोस दृष्टिकोण आवश्यक रहेको उनले जोड दिएका छन्, जुन मुलुकका लागि अहिले अत्यावश्यक छ। विमानस्थलमा सरसफाइको नमुना प्रस्तुत गरिसकेर पशुपतिनाथ क्षेत्र लगायत नेपालका विभिन्न क्षेत्रमा सफल सरसफाइ अभियान सञ्चालन गरी उनी सरसफाइ अभियन्ताको रूपमा परिचित छन्।
अभियान सम्झँदै उनले भने, ‘हामीजस्ता सचेत मानिसहरूले नै विमानस्थलमा फोहोर गरेका थियौं। यदि हामीले सफा नगरेका भए अरूले कसले गर्थ्यो र? रुपान्तरण आफैंबाटै आवश्यक हुन्छ। त्यसैले हामीले काम गर्यौं र एउटा मानक पनि बनायौं। अब फोहोर नगरौं भनेपछि सफा गर्नै पर्दैन।’
भर्खरै प्रकाशित पुस्तकहरूबाट प्राप्त आम्दानीको ५० प्रतिशत रोयल्टी ‘ज्ञान मञ्च’ निर्माणमा योगदान गर्ने योजना रहेको उनले बताए। ‘मेरो उदेश्य केवल पुस्तक बेच्ने मात्र होइन, विचारलाई संरचनामा परिणत गर्ने, संरचनालाई संवादमा बदल्ने र संवादलाई राष्ट्रनिर्माणमा रुपान्तरण गर्ने हो,’ शर्माले भने।
शर्मा वर्तमानमा देश विकास र समृद्धिको मार्ग पहिचान गर्दै अर्को दुई पुस्तकहरू प्रकाशन गर्ने तयारीमा छन्। उनका अनुसार प्रवासी नेपालीहरू सीमित रूपमा मात्र रेमिट्यान्सका स्रोत होइनन्, तिनीहरू ज्ञान, अनुभव, दृष्टिकोण र राष्ट्रियताको स्रोत पनि हुन्। यस पृष्ठभूमिमा उनले यस वर्षभित्रै नेपालको ७७ जिल्लाको सम्भावना, रुपान्तरण र मार्गचित्रमाथि पहिलो पुस्तक र विश्वभरका एनआरएन (एनआरएनए) समुदायबाट नेपालले के सिक्न सक्छ भन्ने विषयमा दोस्रो पुस्तक तयार गर्ने योजना बनाएका छन्।
कार्यक्रममा उनका पुस्तकहरूको समीक्षा गर्दै डा. सुरेश तिवारीले यी पुस्तकहरू देशको समृद्धिका आधारशिला बन्ने बताए। यी पुस्तकहरू व्यवहारमा लागू भएमा नेपालमा विकासका विभिन्न ढोका खुल्ने उनको विश्वास छ।
