१७ वैशाख, काठमाडौं। नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले पित्तथैलीको ढुंगा निकाल्न ल्यापरोस्कोपी शल्यक्रिया सफलतापूर्वक सम्पन्न गरी अहिले घरमै विश्राम गरिरहेका छन्। उनलाई नियमित रूपमा हेरचाह गर्ने चिकित्सक डा. दिव्या सिंहका अनुसार ओलीको स्वास्थ्यमा क्रमशः सुधार हुँदैछ। तथापि, पूर्ण रूपमा स्वस्थ हुन अझै केही समय लाग्ने देखिन्छ। ओलीको शल्यक्रिया ३० चैतमा गरिएको थियो। तीन हप्तापछि पनि उनी सार्वजनिक कार्यक्रममा उपस्थित भएका छैनन्, जसका कारण धेरैले उनको स्वास्थ्य अवस्थाबारे चिन्ता गरेका छन्।
डा. सिंहले भनिन्, ‘शल्यक्रियापश्चात् क्रमशः स्वास्थ्यमा सुधार भइरहेको छ। उहाँ घरमै हिँडडुल गर्न र सामान्य भेटघाट गर्न सक्षम हुनुहुन्छ।’ उनलाई ज्वरो आएको वा स्वास्थ्य बिग्रिएको भन्ने कुनै अफवाहप्रति उनले आफूलाई कुनै जानकारी नआएको पनि बताइन्। उनले थपिन्, ‘यदि कुनै समस्या हुन्थ्यो भने मलाई खबर आउने नै थियो। अहिले पनि आज बिहान उहाँसँग औषधि सम्बन्धी फोनमा कुराकानी भएको थियो, कुनै समस्या छैन।’ पित्तथैलीको ढुंगा ल्यापरोस्कोपी प्रविधिद्वारा सफलतापूर्वक ३० चैतमा निकालिएको थियो।
छिटो स्वास्थ्य लाभ नहुनुको कारण सोध्दा डा. सिंहले भन्नुभयो, ‘उमेर, पहिलेका स्वास्थ्य समस्या र शल्यक्रियाको जटिलताका कारण रिकभरी अन्य बिरामीभन्दा केही सुस्त भइरहेको छ।’ ओलीलाई दुईपटक मिर्गौला प्रत्यारोपण गरिसकिएको छ र मुटुमा एन्जियोप्लास्टीसमेत भइसकेको छ। उनी नियमित औषधि सेवन गरिरहेका छन्, जसले गर्दा स्वास्थ्य छिटो सुधार नआएको हो। उनले थपिन्, ‘पहिलेदेखि रहेका स्वास्थ्य समस्या र मिर्गौला प्रत्यारोपणको इतिहासले गर्दा रिकभरी ढिलो भएको छ।’ शल्यक्रियापश्चात् छातीमा संक्रमण देखिएको थियो, तर औषधि सुरु गरेपछि दुई दिनभित्रै नियन्त्रणमा आएको डा. सिंहले जानकारी दिइन्। हाल घाउ क्रमशः निको हुँदै गएको र टाँका निकाल्ने बाँकी रहेको विवरण पनि उनले शेयर गरिन्।
