नेपाली ओडीआई क्रिकेट टोलीका उपकप्तान दीपेन्द्रसिंह ऐरी आईसीसी ओडीआई अलराउन्डर वरियतामा तीन स्थान माथि उक्लिएका छन्। आईसीसीले मंगलबारसम्मको अपडेट लिएर बुधबार सार्वजनिक गरेको नयाँ वरियता अनुसार दीपेन्द्र अहिले २८औं स्थानमा पुगेका छन्। उनका रेटिङ अंक १५३ पुगेका छन्। घरेलु मैदानमा सम्पन्न लिग २ शृंखलामा उनले २ अर्धशतक र १ शतक प्रहार गर्दै ४ विकेट पनि लिएका थिए।
दीपेन्द्रले यूएईसँगको पहिलो खेलमा ७५ रन बनाएका थिए र १ विकेट पनि लिए। ओमानसँगको खेलमा उनले ६० रन बनाएर २ विकेट झिकेका थिए। यूएईसँगको दोस्रो खेलमा उनले शतक प्रहार गरे। ओमानसँगको दोस्रो खेलमा भने ३३ रन बनाए र १ विकेट लिए। पछिल्लो अपडेटमा यूएईसँगको खेलसम्मको प्रदर्शनलाई मात्र समावेश गरिएको छ। हिजो मंगलबार स्कटल्यान्डविरुद्ध खेलेको खेलको प्रदर्शन भने अर्को हप्ताको अपडेटमा समावेश हुनेछ।
टी-२०ई अलराउन्डर वरियतामा भने दीपेन्द्र चौथो स्थानमै यथावत् रहेका छन्। अलराउन्डर वरियतामा करण केसी तीन स्थान तल झरेर ८४औं स्थानमा पुगेका छन्।
