न्यूनतम सेवा सुविधा नदिने रोजगारदातालाई नेपाली श्रमिक नपठाउने निर्णय : श्रम मन्त्री रामजी यादव

३ असार, काठमाडौं । युवा, श्रम तथा रोजगारमन्त्री रामजी यादवले न्यूनतम सेवा सुविधा नदिने रोजगारदातालाई नेपाली श्रमिक नपठाउने निर्णय गरेका छन्। प्रतिनिधि सभा बैठकमा सांसदहरूको प्रश्नको जवाफ दिंदै मन्त्री यादवले वैदेशिक रोजगारीमा जाने श्रमिकलाई न्यूनतम तलब, सम्मानजनक श्रम र अन्य सेवा सुविधा नदिने रोजगारदातालाई श्रमिक नपठाउने नीति रहेको स्पष्ट पार्नुभएको छ। यस विषयमा उहाँले जेनेभा मा आयोजित ११४औँ अन्तर्राष्ट्रिय श्रम सम्मेलनका क्रममा अन्तर्राष्ट्रिय समुदायलाई जानकारी गराउनुभएको बताइएको छ।

‘गत हप्ता जेनेभा भ्रमणको क्रममा मैले अन्तर्राष्ट्रिय समुदायको अघि आफ्नो कुरा दृढतापूर्वक राखें, जसअनुसार रोजगारदाताले हाम्रा श्रमिकलाई मर्यादित काम, न्यूनतम सेवा सुविधा तथा सम्झौताका अनुसार काम दिन सक्दैनन् भने ती रोजगारदाता जुनसुकै देशका भए पनि हामी श्रमिक पठाउँदैनौं,’ मन्त्री यादवले बताएका छन्। मन्त्रालयले गन्तव्य मुलुकको भूमिका अत्यन्त महत्वपूर्ण रहेको बताएको छ। रोजगारदाता र गन्तव्य मुलुकका सरकारसँग साझेदारी तथा समन्वय बढाउने उपायहरू खोजिरहेको उहाँले जानकारी दिनुभयो।

‘गन्तव्य मुलुकका रोजगारदातालाई एकीकृत मोडेलमा समावेश गराउँदैछौं, ताकि उनीहरू हाम्रो दायरा भित्र रहून्,’ मन्त्री यादवले थप टिप्पणी गर्नुभयो। वैदेशिक रोजगारीको डिजिटलाइजेसन सम्बन्धी प्रतिवेदनमा काम अगाडि बढिरहेको छ र यसको कार्यान्वयन प्रक्रिया सुरु भइसकेको उहाँले बताए। २०६५ सालदेखि थन्किएका पुराना मुद्दाका फाइलहरू व्यवस्थित गर्ने अभियान चलाइरहेको उल्लेख गर्दै मन्त्री यादवले हालसम्म १० हजारभन्दा बढी फाइलहरू डिजिटलाइज गरी वर्गीकरण गरिसकेको र असार महिनाभरि १५ हजार मुद्दा टुंग्याउने लक्ष्यसहित काम भइरहेको जानकारी दिनुभयो।