१८ असार, काठमाडौं । नेपालको प्रतिष्ठित सडक दौड प्रतियोगिता सिद्धार्थ बैंकको १८औं काठमाडौं म्याराथन २०२६ अब केवल १०० दिनमा आयोजना हुन लागेको छ। एनआरएस स्पोर्ट्स फाउन्डेसनको आयोजनामा यो प्रतियोगिता आगामी असोज २४ गते (अक्टोबर १०) दशरथ रंगशालाबाट शुरू हुनेछ। आयोजकका अनुसार यस वर्ष करिब १० हजार धावकहरूको सहभागिता रहने अपेक्षा गरिएको छ। दर्ता खुलाएको पहिलो २४ घण्टाभित्रै फुल म्याराथन, हाफ म्याराथन र १० किलोमिटर दौडका लागि २,५०० भन्दा बढी धावकले नाम दर्ता गरिसकेका छन्। यस पटक पहिलो पटक फुल म्याराथनमा २५ जना महिला धावक सहभागी भएका छन्। आयोजकले यसलाई नेपाली महिलाको आत्मविश्वास, साहस र खेलप्रतिको बढ्दो आकर्षणको ऐतिहासिक संकेतको रूपमा व्याख्या गरेका छन्।
प्रतियोगितामा फुल म्याराथन (४२.१९५ किमि), हाफ म्याराथन (२१ किमि), १० किलोमिटर, ५ किलोमिटर र ३ किलोमिटर दौड समावेश छ। विभिन्न उमेर समूहका साथै खुला, मास्टर्स, कलेज र विद्यालयस्तरीय प्रतिस्पर्धा पनि रहनेछ। यस संस्करणको विशेष आकर्षण ३ किलोमिटर ‘फ्यामिली रन’ रहनेछ, जसमा आमा, पिता र छोराछोरीसहित परिवारका कम्तीमा तीन सदस्यहरूले एउटै टोली बनाएर सँगै दौड्न सक्ने व्यवस्था गरिएको छ। यसले स्वस्थ जीवनशैलीसँगै पारिवारिक एकता प्रवर्द्धन गर्ने विश्वास आयोजकहरूको छ। यस वर्ष भारत, नर्वे, बेलायत, पोल्याण्ड, श्रीलंका, अमेरिका, बंगलादेश, चीन, इन्डोनेसिया, जापान र फ्रान्सलगायत देशहरूबाट १२० भन्दा बढी अन्तर्राष्ट्रिय धावकले सहभागिता सुनिश्चित गरिसकेका छन्। अन्य देशबाट पनि दर्ता जारी रहेको आयोजकले जानकारी दिएका छन्। प्रतियोगितालाई एकदिने कार्यक्रममा सीमित नराखी विद्यालय तथा कलेज अभियान, रनिङ क्लबहरूसँग सहकार्य, सामूहिक दौड र सामाजिक सञ्जाल अभियानमार्फत शहरव्यापी खेल अभियानका रूपमा अघि बढाइएको छ। वडा कार्यालय, स्थानीय तह र विभिन्न संघसंस्थाहरूको सकारात्मक सहकार्यले यस वर्षको काठमाडौं म्याराथन अझ भव्य, व्यवस्थित र उत्सवमय बनाउने लक्ष्य राखिएको छ। यस वर्षको काठमाडौं म्याराथनको नारा ‘बिल्ड हेल्दी लाइफस्टाइल’ रहेको छ। सीमित सिट बाँकी रहेका कारण इच्छुक धावकलाई यथाशीघ्र दर्ता गर्न आयोजकले अनुरोध गरेका छन्।
