नेपाल र बंगलादेशबीचको खेल इस्लामाबादस्थित गारिसन जिन्नाहा स्पोर्ट्स कम्प्लेक्समा नेपाली समय अनुसार दिउँसो १:४५ बजे सुरु हुनेछ। पाकिस्तानमा जारी काभा पुरुष भलिबल च्याम्पियनसिपमा नेपालले आइतबार बंगलादेशसँग प्रतिस्पर्धा गर्नेछ। लगातार तीन खेलमा पराजित नेपालका लागि सेमिफाइनल प्रवेशका लागि बंगलादेशविरुद्ध जीत अनिवार्य छ।
काठमाडौं – पाकिस्तानको इस्लामाबादमा भइरहेको काभा पुरुष भलिबल च्याम्पियनसिपमा नेपालले आफ्नो चौथो खेल आइतबार बंगलादेशसँग सम्पन्न गर्न लागेको छ। लगातार तीन खेलमा पराजित नेपालका लागि बंगलादेशसँगको खेल सेमिफाइनल प्रवेशका लागि अत्यावश्यक छ। नेपालले अहिलेसम्म खेलेका तीनै खेलमा पराजय भोग्दै जम्मा २ अंक मात्र जोड्न सफल भएको छ।
कजाखस्तान र श्रीलंकासँगको खेलमा पाँच सेटसम्म पुगेर पराजित नेपालले दुवै खेलबाट समान १–१ अंक प्राप्त गरेको थियो। तेस्रो खेलमा घरेलु टोली पाकिस्तानसँग नेपाल सिधा सेटमा पराजित भयो। बंगलादेशले अहिलेसम्म खेलेका तीन खेलमध्ये दुई जितेको छ भने एक खेलमा पराजित भएको छ।
आइतबार कजाखस्तान र श्रीलंका तथा पाकिस्तान र उज्बेकिस्तानबीच पनि खेल हुनेछ। ६ टोली सहभागी प्रतियोगितामा पाकिस्तान ९ अंकसहित अपराजित रही शीर्ष स्थानमा छ। बंगलादेश ४ अंकसहित तेस्रो स्थानमा छ भने नेपाल २ अंकसहित पछाडि छ। नेपालका लागि शीर्ष चारमा पुगेर सेमिफाइनलमा प्रवेश गर्न बंगलादेशविरुद्ध जीत अनिवार्य छ। यस प्रतियोगितामा नेपाल एक मात्र जीतविहीन टोली हो। नेपालले लिग चरणको अन्तिम खेल सोमबार उज्बेकिस्तानसँग खेल्नेछ।
