नेपाल एसोसिएसन अफ टुर एन्ड ट्राभल एजेन्ट्स (नाट्टा) को ५९ औं वार्षिक साधारणसभा र नयाँ कार्यसमिति निर्वाचन आगामी शुक्रवार हुन लागेको छ। नाट्टाको नेतृत्वका लागि जिस्वाँ तुलाधर श्रेष्ठ, युबिका भण्डारी र भरतजंग पाण्डेको नेतृत्वमा तीन छुट्टाछुट्टै प्यानलहरू चुनावी प्रतिस्पर्धामा रहेका छन्। तीनै प्यानलले पर्यटन व्यवसायलाई अर्थतन्त्रको मुख्य आधार बनाउने विषयलाई आफ्नो प्राथमिकतामा राख्दै प्रतिबद्धतापत्र सार्वजनिक गरेका छन्। २४ साउन, काठमाडौं।
सन १९६६ मा स्थापना भएको टुर तथा ट्राभल व्यवसायीहरूको छाता संगठन नेपाल एसोसिएसन अफ टुर एन्ड ट्राभल एजेन्ट्स (नाट्टा) को नयाँ नेतृत्वका लागि त्रिपक्षीय प्रतिस्पर्धा हुने भएको छ। आगामी शुक्रवार नाट्टाको ५९ औं वार्षिक साधारणसभा र २५ औं कार्यसमिति निर्वाचन हुने तय गरिएको छ। नाट्टाको आगामी नेतृत्वका लागि जिस्वाँ तुलाधर श्रेष्ठ, युबिका भण्डारी र भरतजंग पाण्डेको नेतृत्वमा छुट्टाछुटै प्यानल चुनावी मैदानमा छन्। यसपटक प्रतिस्पर्धीहरूले पर्यटन व्यवसायलाई नेपालको अर्थतन्त्रको मुख्य आधार बनाउने विषयलाई आफ्नो एजेन्डामा सर्वोच्च प्राथमिकता दिएका छन्। हाल नाट्टाको अध्यक्ष कुमार मणि थापलिया रहेका छन्। यो निर्वाचन सन् २०२६ देखि २०२८ कार्यकालका लागि नयाँ कार्यसमिति चयनसमेत हुनेछ।
नाट्टाको आगामी नेतृत्वका लागि वरिष्ठ उपाध्यक्ष जिस्वाँ तुलाधर श्रेष्ठको नेतृत्वमा प्यानल घोषणा गरिएको छ। ‘सबल नेतृत्व, सुरक्षित व्यवसाय र समृद्ध पर्यटन’ भन्ने नारासाथ यो समूह चुनावी प्रतिस्पर्धामा छ। शनिबार यस समूहले १२ बुँदे निर्वाचन प्रतिबद्धतापत्र सार्वजनिक गरेको छ। यो समूहले नाट्टालाई सबल, समावेशी, पारदर्शी, प्रविधिमैत्री र व्यवसायमुखी संस्था बनाउने प्रतिबद्धता व्यक्त गरेको छ। नयाँ पुस्ताका पर्यटन उद्यमीलाई प्रोत्साहन गर्ने विषय पनि यस समूहको प्राथमिकतामा छ।
नाट्टाको वर्तमान कार्यसमितिमा महासचिवको जिम्मेवारीमा रहेकी युबिका भण्डारी आगामी नेतृत्वका लागि प्रतिस्पर्धा गरिरहेकी छन्। शशिज होलिडेज इन्टरनेसनल ट्राभल एण्ड टुर्स प्रालिका प्रबन्ध निर्देशक युबिकाको प्यानल ‘पर्यटन उठे, नेपाल उठ्छ’ नारासहित चुनावी मैदानमा छ। भण्डारीसँग दुई दशकभन्दा बढी पर्यटन अनुभव छ। उनले नाट्टा कार्यसमितीमा पटकपटक काम गरिसकेकी छन्। यस समूहले उपत्यका बाहिरका व्यवसायीलाई पनि समान प्राथमिकता दिने प्रतिबद्धता जनाएको छ।
भरतजंग पाण्डे नेतृत्वको प्यानलले पनि चुनावी प्रतिस्पर्धा गरिरहेको छ। पाण्डे एभरेस्ट मिराकल ट्राभल एण्ड टुर्सका प्रबन्ध निर्देशक हुन्। उनले ‘नाट्टा रूपान्तरण’ भन्ने नारा लिएको प्यानलमा ‘सशक्त नाट्टा, समृद्ध पर्यटन सदस्यसँगै सदस्यका लागि’ भन्ने मूलमन्त्र छ। यस प्यानलले सुशासन, पारदर्शिता र सदस्य सहभागितामा जोड दिएको छ।
