समाचार सारांशः कार्यालय पोशाकमा मिनिमल गहना लगाउने चलन बढ्दै गएको छ। यसक्रममा साना, सफा र आकर्षक डिजाइन भएका गहना छनोट गर्नु लाभप्रद हुन्छ। औपचारिक साडीमा मोतीका स्टड, सानो हीरा जस्तो इयररिङ, पातलो चेन, साधारण घडी तथा एउटा पातलो बाला वा कंगन लगाउनु पर्याप्त मानिन्छ। कार्यालयमा राम्रो देखिनेका लागि मात्र कपडा होइन, त्यससँग मिल्ने गहना र एक्सेसरी पनि अत्यन्त महत्त्वपूर्ण हुन्छन्। विशेषगरी कर्पोरेट वा औपचारिक वातावरणमा गहनाले व्यक्तित्वलाई आकर्षक बनाउने साथै समग्र पोशाकलाई व्यवस्थित र व्यावसायिक देखाउन मद्दत गर्छ। तर कार्यालय पोशाकमा गहना छनोट गर्दा फेसनभन्दा बढी सादगी, सफाइ र सन्तुलनमा विशेष ध्यान दिन जरुरी हुन्छ।
आजको कर्पोरेट फेसनमा मिनिमल गहनाको प्रवृत्ति तीव्र रूपमा बढेको छ। धेरै ठूलो नेकलेस, भारी झुम्का, धेरै चुरा वा अत्यधिक चम्किला गहनाको सट्टा साना, सफा र आधुनिक डिजाइन भएका गहना लगाउने चलन छ। सही गहना छनोट गर्न सके सर्ट–प्यान्ट, कुर्ती, ब्लेजर वा साडीका पोशाकहरू पनि प्रभावकारी र व्यावसायिक देखाउन सकिन्छ। सर्ट र प्यान्टसँग कस्तो इयररिङ लगाउने? सर्ट र प्यान्ट कार्यालयमा सबैभन्दा सामान्य औपचारिक पोशाक हो। यससँग स्टड इयररिङ लगाउनु सबैभन्दा सुरक्षित र स्टाइलिश विकल्प हो। सानो डायमण्ड, मोती, सुन वा चाँदीका स्टडहरूले लुकलाई भड्किलो नबनाइ आकर्षक बनाउँछन्। विशेषगरी सेतो, कालो, नेभी, बेईज, ग्रे वा अन्य न्यूट्रल रङका सर्टसँग साना मेटल स्टडहरू निकै राम्रो देखिन्छन्।
यदि पोशाकमा प्रिन्ट वा डिजाइन धेरै छ भने पनि सिधा र साधारण इयररिङ रोज्नु उपयुक्त हुन्छ। स्टड इयररिङ साना हुने भएकाले बन, लो पोनीटेल वा सफा र व्यवस्थित हेयरस्टाइलसँग अझै राम्रो देखिन्छ। यसले अनुहारलाई पनि सफा र स्मार्ट बनाउन सहयोग पुर्याउँछ। ध्यान दिनुपर्ने कुरा के हो भने सर्ट र प्यान्टसँग अत्यन्त ठूला हुप वा लामो झुम्का लगाउनबाट बच्नुपर्छ। इयररिङको डिजाइन धेरै चम्किला वा आवाज गर्ने किसिमका हुनु हुँदैन।
