बङ्गालको खाडीमा विकास भएको न्यूनचापीय प्रणालीको प्रभावका कारण नेपालका विभिन्न स्थानमा वर्षा भइरहेको छ। अविरल वर्षाका कारण धादिङ जिल्लाका पृथ्वी राजमार्गअन्तर्गत कृष्णभीर क्षेत्रमा पुनः पहिरो गएको छ। अधिकारीहरूले दिएका जानकारीअनुसार उक्त सडकको केही भाग पहिरोले बगाएको छ।
अघिल्लो महिनामा भोटेकोशी र त्रिशूली नदीमा आएको ठूलो बाढीले कृष्णभीर सडक कटानमा समस्या सिर्जना गरेको कारण केही हप्तासम्म सवारी आवागमन रोकिएको थियो। त्यसपछिको परिस्थितिमा कृष्णभीरमा सडकभन्दा माथिल्लो भाग काटेर वैकल्पिक मार्ग निर्माण गरिएको थियो र त्यो बाटो असोज १ गतेदेखि सञ्चालनमा आएको छ।
